العبودية الجديدة: استغلال الجهل والفقر أمام صمت الدولة؟؟… محمد منيالي المنذوب الجهوي للشبكة الوطنية لحقوق الانسان جهة بني ملال خنيفرة
شفتو داك الفيديو ديال بنادم كيبوس رجلين بنادم آخر؟ شفتو بنادم جايب عجل وكيقدمو قربان لإنسان بحالو؟ من الناحية الحقوقية، هادشي اسمو عبودية في ثوب جديد. ضرب صارخ لمبدأ الكرامة: الدستور المغربي في الفصل 22 كيقول “لا يجوز المس بالسلامة الجسدية أو المعنوية لأي شخص” والكرامة هي أساس كل الحقوق. الإعلان العالمي لحقوق الإنسان كيبدأ بـ “يولد جميع الناس أحرارا متساوين في الكرامة والحقوق”. فاش كتخلي بنادم يركع ويبوس رجليك، انت ما بقيتيش شيخ، انت وليتي كتمارس إذلال ممنهج لإنسان آخر وكتجردو من إنسانيتو. استغلال للهشاشة والجهل: الحقوقي لا يلوم الضحية، بل يلوم من يستغلها. هاد الناس اللي كيبوسو الرجلين أغلبهم ناس بسطاء، جايين من الفقر والحاجة والمرض، كيقلبو على أمل. كاين لي كيوهمهم أن الشفاء والرزق عند “الشيخ” أو عند “الضريح”. هذا استغلال للنفوذ الروحي والنفسي لتحقيق مكاسب مادية (فلوس، عجول، هدايا) ومعنوية (السلطة). وهذا في القانون الدولي كيدخل في خانة الاستغلال.
هادي ماشي حرية معتقد، هادي إهانة: حرية المعتقد مصونة، وكل واحد حر يتصوف بطريقتو ويحب الصالحين. ولكن حريتك كتوقف فاش كتبدأ كرامة الآخر. ما يمكنش نبرر الذل والإهانة العلنية للإنسان باسم “التقاليد” أو “المحبة”. التقاليد اللي كتهين الإنسان خاصها تقطع.
التصوف المغربي الأصيل كان دائما مدرسة لتحرير الإنسان من عبودية المادة والأنا، ماشي باش يردو عبد عند عبد آخر.
المطلوب اليوم ليس فقط من وزارة الأوقاف، بل من المجلس الوطني لحقوق الإنسان والمجتمع المدني يدق ناقوس الخطر. خاصنا نحاربو الجهل اللي كينتج هاد العبودية الطوعية، ونحميو كرامة المواطن المغربي.
الإنسان المغربي خلق حر، وغادي يبقى حر، وما خصو يركع حتى لشي واحد من غير القانون اللي كيساوي بين الجميع.
